काठमाडौं – बाँदरले दुख दिएपछि पोखरा महानगरपालिका वडा नं १९ ले रुख काट्न उर्दी जारी गरेको छ ।
वडाध्यक्ष पुष्पेन्द्र पाण्डेले सोमबार एक सूचना जारी गर्दै ‘मेरो रुख म काट्छु’ अभियान सञ्चालन गर्न वडाबासीलाई आग्रह गरेका हुन् । आव २०८०/०८१ को नीति तथा कार्यक्रममा समेत बाँदर नियन्त्रण सम्बन्धि नीति पास गरेको भन्दै वडाध्यक्ष पाण्डेले त्यस्तो उर्दी जारी गरेका हुन् ।
सामाजिक सञ्जालदेखि आम मिडियासम्म त्यसको आलोचना भएपछि पोखरा महानगरपालिकाले भने त्यसको खण्डन गरेको छ । पोखरा महानगरका मेयर धनराज आचार्यले सामाजिक सञ्जालमा लेख्दै कार्यपालिकाबाट कुनै पनि निर्णय नभएको स्पष्ट पारेका छन् । महानगरपालिकाबाट रुख काट्ने सम्बन्धमा कुनै निर्णय नभएको हुँदा त्यस्तो कार्य नगर्न निर्देशन समेत दिएका छन् ।
‘आफ्नो रुख आफै काटौ अभियान भनेर रुख काट्न आह्वान गरेको भन्ने सुचना प्रकासित भएको सन्दर्भमा यस सम्वन्घमा स्थानीय सरकार सँञ्चालन ऐन बमोजिम महानगरपालिकाबाट कुनै निर्णय नभएकोले सो सम्वन्घि कुनै पनि कार्य नगर्नु नगराउनु हुन सम्वन्घित सबैलाई जानकारी गराईसकिएको छ। भर्ममा नपर्नु हुन अनुरोध छ।’ उनले भनेका छन् ।
