पालुङ – झुस्स कपाल, फुस्स पोशाक अनि हातमा झाडु । आइतबार यस्तै सामान्य भेषभुषामा जङ्गलको बाटो सरसफाइमा देखिए मकवानपुरको एक मात्र नगरपालिका थाहा नगरपालिकाका प्रमुख । उनी हुन् मेयर बिष्णु बिष्ट ‘आदर्श’ ।
उनकै अगुवाइमा थाहा नगरपालिका–४ स्थित प्रसिद्ध धार्मिक तथा पर्यटकीय स्थल ॠषेस्वर–छ्युमी झ्याङछुप क्षेत्रमा वातावरण संरक्षण, धार्मिक पर्यटन प्रवर्द्धन तथा क्षेत्रको स्वच्छता अभिवृद्धिको लक्ष्यसहित भव्य सरसफाइ अभियान सम्पन्न गरिएको छ।
अभियानको सम्पुर्ण ब्यबस्थापन तथा समन्वय ॠषेस्वर–छ्युमी झ्याङछुप क्षेत्र विकास समितिले गरेको हो। कार्यक्रममा थाहा ४ का वडा अध्यक्ष नारायण लामा, महिला वडा सदस्य चन्द्रमाया थिङ, नेपाली कांग्रेस थाहा नगर उपसभापति नवराज कार्की, प्राथमिक स्वास्थ्य केन्द्र पालुङका प्रमुख डा. जोनसन बिके, इलाका प्रहरी कार्यालय पालुङका प्रतिनिधि, सूचना अधिकारी सुरजकुमार भुजेल, नगर प्रहरी प्रमुख किरण गिरि लगायत विभिन्न निकायका विशिष्ट व्यक्तिहरुको सहभागिता रहेको थियो।
सरफसफाइ अभियानमा स्थानीय बासिन्दा, होटल व्यवसायी, पत्रकार, युवा क्लबका प्रतिनिधि, धार्मिक संघसंस्था तथा शुभेच्छुकहरुको समेत उल्लेखनीय सहभागिता रहेको थियो।
कार्यक्रममा वाइसीएल थाहा नगर सचिव विश्वनाथ रायमाझी, एभरेष्ट क्लब अध्यक्ष शिवकुमार खत्री, फरक सोच अध्यक्ष यादबजंग रायमाझी, नवजागरण युवा क्लब अध्यक्ष सोमलाल गोले, झिरघारी सामुदायिक वन अध्यक्ष सिताराम रुम्बा, ॠषेस्वर सामुदायिक वन कार्यवाहक अध्यक्ष विनोद केसी, नेकपा एमाले र माओवादी केन्द्र थाहा–४ का अध्यक्षहरू ज्ञानेन्द्र अधिकारी र राजकुमार पन्त, साथै विभिन्न बजार र टोल विकास समितिका अध्यक्षहरूको सक्रिय उपस्थिति थियो।
कार्यक्रम सफल बनाउन मास्क, पञ्जा, झाडु, डस्टबिन तथा खाद्य सामग्री उपलब्ध गराउने मनश्याम बस्नेत, प्राथमिक स्वास्थ्य केन्द्र पालुङ, थाहा नगरपालिका, निरोज प्रधान र शिवकुमार खत्रीलाई विशेष धन्यवाद व्यक्त गरिएको छ।
सम्पूर्ण अभियानको नेतृत्व गरिरहेका ॠषेस्वर–छ्युमी झ्याङछुप क्षेत्र विकास समितिका अध्यक्ष बिनोद लामाले धार्मिक क्षेत्रको संरक्षणमार्फत थाहा नगरलाई स्वच्छ, समृद्ध र पर्यटकीय आकर्षणयुक्त नगरका रूपमा विकास गर्ने दीर्घकालीन लक्ष्यसहित यस्तो अभियानलाई निरन्तरता दिने प्रतिबद्धता व्यक्त गर्नुभयो।
